1. كل المواضيع تعبّر عن رأي صاحبها فقط و ادارة المنتدى غير مسؤولة عن محتوياتها
    إستبعاد الملاحظة

تـعـلـم الـوزن .. بـطـريـقـة بـو رحـيـمـه

الموضوع في 'منتدى الشعر والأدب' بواسطة gaithmatrix, بتاريخ ‏9 جويلية 2007.

حالة الموضوع:
مغلق
  1. gaithmatrix

    gaithmatrix نجم المنتدى

    إنضم إلينا في:
    ‏10 نوفمبر 2006
    المشاركات:
    3.181
    الإعجابات المتلقاة:
    465
      09-07-2007 09:17
    تعلم الوزن .. مع بو رحيمه

    احم احم ...

    * شو يستوي فيك لما يقولك شاعر " قصيدتك مش موزونه" ؟؟

    * خاطرك تتعلم الاوزان عسب محد يوزن قصيدتك ، ونته ما تدري شالسالفه؟؟

    *خاطرك يوم تكتب قصيده محد يحط عليها و يقول " مش موزونه" ؟؟

    * بإختصار ... خاطرك تتعلم اوزان الشعر النبطي؟؟

    عنــــــــــــدي الحــــــــــــــــــــل

    طبعا .. لكل شاعر طريقته في كتابة القصايد الموزونه ، و كل واحد له اسلوبه في وزن الابيات ..

    و المشهور ان شي طريقتين للوزن ..


    1. الطريقه السهله 2. الطريقه الصعبه

    .:: الطريقه السهله ::.

    هذي الطريقه انا اعتبرها حق الكسالا ، اللي ما ودهم يتعلمون شي ... فإختصروا الوزن بتلحين ابياتهم على لحن اغنيه يعرفونها ... و اذا حسوا ان اللحن ما ايي في هالبيت يعرفون انه مش موزون ، بس هذي الطريقه مش مضمونه ، و في القصايد اللي اتبع الشاعر وزنها بهالطريقه تكون مكسوووره في عدة اوضــاع

    .:: الطريقه الصعبه ::.

    يقول المثل " الشيخ من شاخ نفسه " ، ونا اقووول "" الشاعر من وزن قصيدته "" .. و الوزن بهذي الطريقه يبالها اوراق و قلامه .. يعني سيروا المكتبات اليوم خخخخخخخ .. المهم .. يبالكم عسب توزنون صح .. انكم تردون بذاكرتكم لورا
    من صف اول ابتدائي <<< يبالكم التحليل " لو ما تذكرونه ما بتوزنون صح "

    صف اول ثنوي <<< يبالكم تذكرون التقطيعات العروضيه .. و " ـــ ب ـــ ـــ " ، لو ما تذكرون هذي الحركات ، ماعليه انا باعلمكم و اللي متعقد منها او انه كره حياته يوم درسها ، انا بعلمك اياها بطريقتي ، مش بطريقة الكتاب .. يعني ما بتلوع جبدك ، الا اذا ما عيبك الشرح خخخخخ.. بس التحليل " تحليل الكلمات " يعتمد عليكم انتوا ، و هوه وايــــــد مهم .. يعني لازم تعرفون تحللون .. لازم .. بس بحاول اشرحه لكم عسب تذكرونه و يمكن حد فيكم يفهمه و يحلل صح ..و يلا نبدا

    اول شي " تحليل الكلمات "
    هذا التحليل نفس تحليل اول ابتدائي ، لكنه يختلف اختلاف بسيط عنه ... انكم هنه تحللون الكلمات على حسب النطق
    مش على حسب الحروف المويوده .. و تقطيع الجلمه يبالها شروط .. يعني الجلمه المقطعه تكون اما حرف بنفسه او حرفين ، ما يستوي يكونوا ثلاث حروف .. اول شي
    الحرف اللي عليه حركات الفتحه و الضمه و الكسره .. يكون روحه ...
    و الحرف اللي عليه السكون ، او انه يكون ممدود بحروف المد " و هي الالف و الياء و الواو " .. هذا يكون معاه حرف ثاني .. فإذا كانت السكون عليه ياخذ الحرف اللي قبله ، اما اذا كان ممدود ياخذ الحرف اللي بعده و اللي هوه حرف المد ..
    و الحرف اللي عليه شدّه .. يكون مكرر مرتين ، الاول يكون عليه سكون .. و الثاني حركة " فتحه او ضمه او كسره".. يعني ما يبالكم غير انكم تفككونه و تتبعون الطريقه نفسها
    و الحرف اللي عليه تنوين .. يكون بعده حرف النون على طول ، لانكم تنطقونه .. بس ما تكتبونه

    و باييب لكم امثله

    * بوظــَبي *

    هذي الجلمه بحللها لكم .. نشوف اول حرف ، حرف الباء .. ما عليه حركه لكنه ممدود بالواو .. صح؟ ، يعني الباء و الواو مع بعض

    و بتكون
    بو /
    حرف الظاد عليه حركه .. و هيه الفتحه ، يعني بيكون روحه ما عنده أي حرف ثاني

    و بتكون
    بو / ظـ /
    حرف الباء الثاني ما عليه حركات لكنه ممدود بالياء .. يعني بناخذ معاه حرف الياء
    و بيكون تحليل الجلمه

    بو / ظـ / بي

    *متـْكـَسِّرْ *

    اول حرف عادي .. الثاني عليه سكون .. و السكون تاخذ اللي قبلها .. يعني اول حرفين مع بعض
    و تكون
    متـ /
    الكاف عليها فتحه ، بس قبلها حرف السين عليه شّده .. يعني ما بيكون روحه .. لان حرف السين حرفين داخل بعض ، اول حرف عليه سكون و الثاني حركه .. يعني الجلمه اصلا نطقها متـْكـَسْـسِرْ .. صح ولا ؟ ... يعني حرف الكاف و السين اللي عليه السكون بيكونون مع بعض
    و تكون
    متـ / كسـ /

    السين الثانيه عليها حركه .. بس حرف الراء عليه سكون .. يعني بيكونون مع بعض ، و تكون الجلمه المقطعه
    متـ / كسـ / سر

    و هذي جلمه ثالثه ..

    * الشـَّمْـس *

    و قلت لكم ان في حروف تنكتب و ما تنطق .. و التقطيع يعتمد على النطق .. لو تنطقون الجلمه هذي .. بيكون
    اشـْـشـَمْـس .. صح؟

    و حرف الشين عليه شده لا تنسون ، من جذه استوو حرفين يوم كتبناها حسب النطق .. احين قطعوها .. بتكون
    اشـ / شمـ / س

    *حـَبـيـبـي *

    يلا قطعوها انتوا ...



















    صح شطااااااااار .. و تقطيعها

    حـ / بي / بي

    لا تنسون شي حروف تنكتب لكن ما تنطق .. و هذا مهم وايـــد ، لانا يوم نقطع نقطع على حسب النطق مش الكتابه

    و بعد بييب مثال على الحروف اللي تنكتب و ما تنطق

    * الذ َّرب *

    هذي بنكتبها اول على حسب النطق ..و تكون
    اذ ْذ َرْب

    صح؟ ... انزين ، نطقها جذه ، و عقب قطعوها
    تطلع
    اذ / ذر / ب

    و شي حروف تنطق بس ما نكتبها .. و نحن نمشي على النطق ..
    مثل

    * لكـــــــنْ *

    و نطقها لاكـــــنْ ..

    و يوم نكتبها بيكون على حسب نطقها
    و تكون

    لا / كن

    و شي امن الجلمات اللي تشتبك مع جلمه ثانيه ... يعني مثلا

    * عين الغزال *

    و نطقها يكون

    عينل غزال

    و تقطيعها

    عيـ / نل / غـ / زا / ل

    و أي جلمتين ثانيات

    * حبيب الروح *

    و نطقها

    حبيـبر روح

    و تقطيعها

    حـ/ بيـ / بر / رو / ح

    كـــــــــله على حسب النطق لا تنسووون ..

    و التنوين .. له سالفه ثانيه ، .. يعني مثلا

    * ساهر ٍ *

    مثل ما قلت لكم .. على حسب النطق اكتبوها

    بتكون

    ساهرن

    و تقطيعها طبيعي

    سا / هـ / رن

    * متعب ٍ قلبي *

    تنكتب

    متعبن قلبي

    و تقطيعها

    متـ / عـ / بن / قلـ / بي

    و لو نكتب جمله و نقطعها ، مثلا:

    * مـتـْمـيّـز ٍ مـا بـيـن كـل الـمـخـالـيـق *

    نكتبها على حسب نطقها تطلع

    مـتـمـيـيـزن ما بين كل للمخاليق

    و تقطيعها

    متـ / ميـ / ـيـ / زن / ما / بيـ/ ـن / كل / للـ / مـ / خا / ليـ / ق

    و شي امن الحروف اللي ما تكتبونها ، و هذي جمله ثانيه حرف الياء فيها ما كتبناه ، لانا يوم ننطق الجمله ما ننطقه ، لكنا نكتبه

    * تـمـلـّكـنـي الغرام و سحر عينه *

    و لو تقطعونها على حسب نطقها

    تكون

    تـ / ملـ / لكـ / نل / غـ / را / مو / سحـ / ر / عيـ / نه

    بين الحرفين اللي لونتهم بالاحمر حرف الياء بس ما كتبناه ، لاننا ما ننطقه

    ::*::*::*::*::*::*::*::

    في شي مهم اسمه " الظرورات الشعريه " ، و هذي انكم تصرفون الممنوع من الصرف ، و تجمعون جلمه بغير جمعها الاصلي .. و تحطون الحركات بالموضوع اللي تبونه عسب يظبط معاكم الوزن .. يعني مثلا

    * الذ َّرب *

    هذي الجلمه امساعه قطعناها جذه

    اذ / ذر / ب

    لانا حطينا على حرف الراء سكون .. لو نشل السكون من حرف اراء و نحطه على الباء ، بيتغير التقطيع و بيستوي

    اذ / ذ / رب

    بس حركه انحطت مكان ثاني ، و تغير التقطيع ..

    فهمتـــــوا ؟؟؟؟؟؟ ...

    بس حاولوا ما تستخدمونه وايد ، لان جذه بتبانون ما تعرفون للقصايد فتلعبون بالكلمات قد ما تبون

    احين .. خلصنا التحليل .. و اريدكم تشلون كلمات امن القصايد النبطيه و تحللونها فالبيت .. و عقب ما تشوفون انفسكم تمكنتوا امنه .. تعالوا على الجزء الثاني من الوزن ..
    و هوه ما يباله شي لو عرفتوا تحللون ..
    احين .. انا كتبت لكم فوق " ـــ ب ـــ ـــ "
    ـــ <<< يسمونها شرطه
    ب <<< يسمونها بـــاء
    يوم بتيـبون الجلمه اللي قطعتوها ، تكون كل حرفين او حرف مع بعض صح؟ .. يعني حـبيـبي .. كان تقطيعها

    حـ / بيـ / بي

    الحاء حرف روحه ، و الباقي حرفين حرفين .. نحن بنرمز للحرف بـ " ب " ، و بنرمز للحرفين بـ " ـــ " .. يعني بنحط تحت كل حرف رمزه

    و بيكون

    حــ / بيــ / بي
    ب / ـــ / ـــ
    صح ؟؟ .. يلا ييبوا كل جلمه و حطوا تحتهم الرموز ، الحرف تحته باء و الحرفين تحتهم شرطه

    بو / ظـ / بي
    ـــ / ب / ـــ

    متـ / كسـ / سر
    ـــ / ـــ / ـــ

    اشـ / شمـ / س
    ـــ / ـــ / ب

    اذ / ذر / ب
    ـــ / ـــ / ب

    لا / كن
    ـــ / ـــ

    عيـ / نل / غـ / زا / ل
    ـــ / ـــ / ب / ـــ / ب

    حـ/ بيـ / بر / رو / ح
    ب / ـــ / ـــ / ـــ / ب

    سا / هـ / رن
    ـــ / ب / ـــ

    متـ / عـ / بن / قلـ / بي
    ـــ / ب / ـــ / ـــ / ـــ

    متـ / ميـ / ـيـ / زن / ما / بيـ/ ـن / كل / للـ / مـ / خا / ليـ / ق
    ـــ / ـــ / ب / ـــ / ـــ / ـــ / ب / ـــ / ـــ / ب / ـــ / ـــ / ب

    تـ / ملـ / لكـ / نل / غـ / را / مو / سحـ / ر / عيـ / نه
    ب / ـــ / ـــ / ـــ / ب/ ـــ / ـــ / ـــ / ب / ـــ / ـــ


    فهمتوا ؟؟؟؟ ..

    انا يبت لكم كلمات عشوائيه ، لكن يوم بتكتبون القصيده .. بتاخذون لها وزن مثلا .. وزن الونه ..
    و هوه
    مستفعلن فعلاتن مستفعلن فعلاتن

    حللوه

    بيكون

    مسـ / تفـ / عـ / لن / فعـ / لا / تن .. مسـ / تفـ / عـ / لن / فعـ / لا / تن

    و لو تحطون الرموز تحتهم بتظهر

    ـــ / ـــ / ب / ـــ / ـــ / ـــ / ـــ .. ـــ / ـــ / ب / ـــ / ـــ / ـــ / ـــ

    يوم بتكتبون اول بيت .. لازم يوم تقطعونه يطلع نفس هـــذا بالضبط .. ولا غير هذا بيكون مكسور الوزن .. لكن في شي اسمه زحافات و علل .. يعني تقدرون تغيرون من هذا شويه ، و ما بيكون مكسور لان له قانون .. و بتعرفون هذا يوم بتتقنون الوزن صح ..

    احين بتحسونه صعب .. لكن بعد فتره بتتعودون عليه ..

    بعطيكم مثال على بيت الونه

    من خشف ريم آهلـّي .. وآصيح من فرقاه
    لي للحشا محتلـّي .. عرش الملك سوّاه

    قطعوا هالبيتين على حسب النطق

    يطلعون

    من / خشـ / ف / ريـ / ما / هلـ / لي .. وا / صيـ / ح / من / فر / قا / ه
    ـــ / ـــ / ب / ـــ / ـــ / ـــ / ـــ .. ـــ / ـــ / ب / ـــ / ـــ / ـــ / ـــ

    لي / للـ / حـ / شا / محـ / تلـ / لي .. عر / شل / مـ / لك / سو / وا / ه
    ـــ / ـــ / ب / ـــ / ـــ / ـــ / ـــ .. ـــ / ـــ / ب / ـــ / ـــ / ـــ / ـــ

    و بيتطلون بالضبط نفس توزيع الرموز

    فهمتوا ؟؟؟؟ ..

    و هذي هيه الاوزان النبطيه .. و اختاروا ما يحلا لكم ..

    * مستفعلن فاعلاتن مستفعلن فاعلاتن

    * متسفعلن فعلاتن مستفعلن فعلاتن

    * مستفعلن فاعلاتن فا مستفعلن فاعلاتن فا

    * مستفعلن فاعلن مستفعلن مستفعلن فا مستفعلن فاعلن مستفعلن مستفعلن فا

    و ينشق امنه

    مستفعلن فاعلن مستفعلن مستفعلن فاعلان مستفعلن فاعلن

    مستفعلن فاعل مستفعلن مستفعلن فاع

    * مستفعلن فاعلن مستفعلن فاعلن مستفعلن فاعلن مستفعلن فاعلن

    و ينشق امنه

    مستفعلن فاعل مستفعلن فاعل

    * مستفعلن فاعلن مستفعلان مستفعلن فاعلن مستفعلان

    * مستفعلن مستفعلن فاعلن مستفعلن فا مستفعلن مستفعلن فاعلن مستفعلن فا

    * مستفعلن مستفعلن فاعلن مستفعلن مستفعلن فاعلن

    * مستفعلن مستفعلن فا مستفعلن مستفعلن فا

    * مستفعلن مستفعلن فاعلاتن مستفعلن مستفعلن فاعلاتن

    * مستفعلن مستفعلن مستفعلن فاعلن مستفعلن مستفعلن مستفعلن فاعلن

    * مستفعلن مستفعلن مستفعلن مستفعلن

    * مستفعلن مستفعلن مستفعلن مستفعلن مستفعلن مستفعلن

    و ينشق امنه

    مستفعلن مستفعلن مستفعلن فا مستفعلن مستفعلن مستفعلن فا

    * مستفعلن مستفعلن مستفعلن مستفعلن مستفعلن مستفعلن مستفعلن مستفعلن

    * مستفعلن فا مستفعلن فا

    * فاعلاتن فاعلاتن فاعلاتن فاعلاتن

    * فاعلاتن فاعلاتن فاعلاتن فاعلاتن فاعلاتن فاعلاتن

    و ينشق امنه

    فاعلاتن فاعلاتن فاعلا فاعلاتن فاعلاتن فاعلا

    * فاعلاتن فاعلاتن فاعلاتن فاعلاتن فاعلاتن فاعلاتن فاعلاتن فاعلاتن

    * فاعلاتن فاعلن فاعلاتن فاعلن فاعلاتن فاعلاتن فاعلن فاعلاتن فاعلن فاعلاتن

    * فاعلاتن فاعلن فاعلاتن فاعلن فاعلاتن فاعلن فاعلاتن فاعلن

    و هو نفسه :

    فاعلن مستفعلن فاعلن مستفعلن فاعلن مستفعلن فاعلن مستفعلن

    * فاعلاتن فاعلن فاعلاتن فاعلاتن فاعلن فاعلاتن

    * فاعلاتن فاعلن فاعلا فاعلاتن فاعلن فاعلا

    و هو نفسه:

    فاعلن مستفعلن فاعلن فاعلن مستفعلن فاعلن

    * فاعلاتن مفاعيلن فاعلاتن فاعلاتن مفاعيلن فاعلاتن

    * فاعلن فاعلن فاعلن فاعلن فاعلن فاعلن فاعلن فاعلن

    * فاعل فاعل فاعل فاعل فاعل فاعل فاعل فاعل

    * فاعل فاعل فاعل فاعل

    * فاعل فاعل مستفعلن مستفعلن فاعل

    * فاعلن فاعلاتن فاعلن فاعلاتن فاعلن فاعلاتن فاعلن فاعلاتن

    * فاعلن فاعلاتن فاعلن فاعلن فاعلاتن فاعلن

    * فاعلن فاعلاتن فاعلن فاعلاتن

    * فاعلن فاعلاتن مستفعلن فا

    * فاعلن فاعلاتن فاعلاتن فاعلن فاعلاتن فاعلاتن
    فاعلن فاعلاتن فاعلاتن فاعلن فاعلاتن فاعلاتن

    * فاعلن فاعلاتن فاعلاتن فاعلن فاعلاتن
    فاعلن فاعلاتن فاعلاتن فاعلن فاعلاتن

    * مفاعيلن مفاعيلن مفاعيلن مفاعيلن

    * مفاعيلن مفاعيلن مفاعيلن مفاعيلن مفاعيلن مفاعيلن

    * مفاعيلن مفاعيلن مفاعيلن مفاعيلن مفاعيلن مفاعيلن مفاعيلن مفاعيلن

    * مفاعيلن مفاعيلن فعولن مفاعيلن مفاعيلن فعولن

    * مفاعيلن مفاعيلن فعولن مفاعيلن مفاعيلن مفاعيلن فعولن مفاعيلن

    * فعولن فعولن فعولن فعولن فعولن فعولن فعولن فعولن

    * فعولن فعولن فعولن فعولن

    * فعولن فعولن فعولن فعولن فعولن فعولن فعولن فعولن
    فعولن فعولن فعولن فعولن فعولن فعولن فعولن فعولن

    * فعولن مفاعيلن فعولن مفاعيلن فعولن مفاعيلن فعولن مفاعيلن

    * فعولن مفاعيلن فعولن فعولن مفاعيلن فعولن

    * مفعولات مفعولات فاعل مفعولات مفعولات فاعل

    ملاحــــــــــــــظه

    بعض هذي الاوزان مشتقه من بعضها .. و لو بغينا نشتق ما بنخلص لان اعدادها وايد ..

    و يوم باحط لكم موضوع الزحافات و العلل .. باقولكم البحور المشهوره و اوزانها اللي ماخذينها الشعرا و بنوا على اساسها قصايدهم ..

    و اللي ما فهم على شرحي ، بشرح مره ثانيه .. اهم شي تتقنون الوزن
    و لا تنسوووووووووون

    اذا استصعبتوه فالبدايه ، مع الوقت بتتعودونه و بتحسونه سهل ... اخويه يوم فهمته هذي الطريقه تخبل .. و حلف انه ما بيقدر ، و احين استوا يكتب القصيده 14 او 15 بيت ، و تطلع كلها موزونه ، لانه تعود و حاول ، و شد حيله ..

    ما شي فرق امبينكم انتوا و الشعرا الكبار، و محد فيهم ظهر من بطن امه و هو يعرف يوزن .. مثل ما اتعلموا هم .. بتتعلمون انتوا .. و مثل ما قدروا هم ، بتقدرون انتوا ..

    و اهم شي اريدكم تسوونه ، انكم تقرون قصايد .. لانه مع الوقت بتوزنون طبيعي ، و بتعرفون القصيده اللي مش موزونه من مجرد قرايه بس .. و هذي نصيحه من ***** لكم

    اقــــــــــــــــروا قصـــايد موزونــــــــــه


    و اتريا استفساراتكم ..و ابياتكم الموزونه
    تحيتي العطره لكم .. بالتوفيق
    اخوكم غيث
     

  2. nadime

    nadime كبار الشخصيات

    إنضم إلينا في:
    ‏20 ديسمبر 2006
    المشاركات:
    2.226
    الإعجابات المتلقاة:
    9.028
      11-07-2007 01:19
    مشكوووور أخي
     
  3. majhoul tunisien

    majhoul tunisien عضو مميز

    إنضم إلينا في:
    ‏6 جويلية 2006
    المشاركات:
    1.065
    الإعجابات المتلقاة:
    42
      14-07-2007 17:58
    waw mouch normal vraiment ya3tik saha
     
حالة الموضوع:
مغلق

مشاركة هذه الصفحة

جاري تحميل الصفحة...