1. كل المواضيع تعبّر عن رأي صاحبها فقط و ادارة المنتدى غير مسؤولة عن محتوياتها
    إستبعاد الملاحظة

حكاية "الكنام"

الموضوع في 'أرشيف المنتدى العام' بواسطة lassaad.jemai, بتاريخ ‏28 مارس 2008.

  1. lassaad.jemai

    lassaad.jemai نجم المنتدى

    إنضم إلينا في:
    ‏25 أكتوبر 2006
    المشاركات:
    2.146
    الإعجابات المتلقاة:
    378
      28-03-2008 16:47
    :besmellah1:

    سامحوني كان ما فهمتش مليح أما حسب ما حاولت نستوعب من حكاية "الكنام" أو الصندوق الوطني للتأمين على المرض فإنّها المسألة كما يلي: فمّا ثلاثة أنظمة ولازمنا نختارو منها قبل ما يفوت الأجل ويحطّونا في نظام على كيفهم (كي تجي تشوف ماهيش باش تكون أوّل مرّة).

    النظام الأوّل متاع الكرني والسبيطار والصفّ ومشّي دنّوس للفرملي باش يعدّيك قبل الناس وإيجا السبعة متاع الصباح وأقعد ستنّا الطبيب حتى يوصل التسعة ونصّ وحتّى يكمّل قهوتو العشرة وربع وكان موش عاجبك يمكن يسمّعوك وسخ وذنيك. حاسيلو تموت بقدرك في دارك خير.

    النظام الثاني متاع تختار طبيب العائلة، ولازمو يكون جينيراليست متعاقد مع الكنام، وفي الحالة هاذي لازمك كان لا قدّر عليك ربّي ومرضت بمرض مشوم تتعدّى بـParcours du combattant، يعني مسيرة كاملة متاع إجراءات قبل ما تاخذ أوّل حربوشة تداوي بيها روحك. يا سيدي بن سيدي شدّ عندك: أوّل ما تبدى تظهر عليك علامات المرض تعمل دورة في الحومة متاعك وتعرض حالتك على عطّار العايلة وخضّار العايلة وجزّار العايلة، تشوف آش عندك كريدي السّاعة على خاطرك زادم على مشروع تنموي كبير، باهي؟ طلعتشي أمورك لاباس وخذيت ترخيص مبدئي من الناس إلّي تسالك كريدي؟ توّة تنجّم تمشي لطبيب العائلة "الجينيراليست"، يعني متاع الطبّ العام، وكلمة العام لهنا فعلا عرفوا يختاروها مليح على خاطر تقريبا هي المدّة إلّي باش تعدّيها قبل ما تتداوى. من غادي طبيب العائلة كان لقى عندك حاجة تدخل في اختصاص معيّن خاطيه هو يولّي يبعثك لبنكاجي العائلة، على خاطر المسألة كبرت وما عادش متاع لعب، عطاكشي البنكاجي موافقة مبدئيّة زادة هو؟ توّة تنجّم تمشي لطبيب الإختصاص إلّي باش يداويك كان قعد فيك ما يتداوى. حاسيلو النظام الثاني هذا متاع طبيب العايلة لازمك كلّ ما تقصد ربّي للطبيب تسلّم على العايلة متاعك الكلّ على خاطر احتمال كبير ما عادش باش ترجعلهم.

    نجيو توّة للنظام الثالث والأخير، وهو نظام ساهل ماهل في ظاهرو، لا إجراءات ولا والو، ما عليك كان تجبد من جيبك وتخلّص من الميا للألف، سبيطار، كلينيك، طبيب عايلة، طبيب عزّاب، طبيب هجاجل، المفيد إجبد وكتّ الحبّ من جيبك، وأتوة نرجّعولك... بالطبيعة لهنا الإجراءات إلّي رتّحوك منها قبل ما تداوي باش يعوّضوهالك ثاني ومثلّث وإنتي تستنّى في هاك الفليّسات متاعك، وقتها بالطبيعة تشوف الإجراءات الإداريّة على أصولها، وهاذاكة علاش النظام الثالث هذا باش يمنعوه على الناس المرضى بالسكّر وضغط الدمّ والأعصاب وكلّ الأمراض إلّي عندها علاقة بالغزّول ومولاها يولّي حسّاس برشة قدّام البيروقراطيّة.

    حاسيلو أهوكا عندكم الإختيار، وكان ما عجبكمش تقعدلكم الوقّاعة (بثلاثة نقاط فوق القاف) والأطباء الروحانيّين، تنجّموا تتّصلوا بيهم على أعمدة جريدتكم المفضّلة وربّي يجيب الشفاء. على كلّ فمّا خبر باهي وهو (كيما كنت متوقّع) التأخير في آخر أجل لإختيار المنظومة إلّي تواتيكم إلى نهاية شهر أفريل، مع أنّي نتوقّع تمديد آخر من هنا لوقتها كيما جرات العادة كلّ ما يقولولنا آخر أجل. تي المفيد الصحّة لاباس ولا يخلّينا ليه
     
    17 شخص معجب بهذا.
  2. samidaviss

    samidaviss عضو نشيط

    إنضم إلينا في:
    ‏20 أوت 2007
    المشاركات:
    190
    الإعجابات المتلقاة:
    123
      28-03-2008 17:53
    يعطيك الصحة في طرح الموضوع والله هذه الحقيقة وربي ايخاليك للمنتدى نحن بحاجة لاناس تتكلم بصراحة ووضوح
     
    1 person likes this.
  3. stephantalon

    stephantalon عضو فعال

    إنضم إلينا في:
    ‏6 فيفري 2008
    المشاركات:
    411
    الإعجابات المتلقاة:
    871
      28-03-2008 19:50
    :klap::40:ya3tek essa7a c bien la vérité
     
  4. jassine

    jassine عضو مميز

    إنضم إلينا في:
    ‏28 نوفمبر 2005
    المشاركات:
    886
    الإعجابات المتلقاة:
    1.120
      29-03-2008 10:43
    القوانين هذي عاملينها لمصلحهتهم هوما بركة

    والإختيارات الثلاثة هي


    الإختيار الأول
    تموت وإنتي شاد الصف في السبيتارات وتشبع كشة من هاك الفرملية الليي ياسر متربين

    الإختيار الثاني
    تموت وإنتي تفركس في طبيب متعاقد مع الكنام واللي موش موجودين بكثرة

    الإختيار الثالث
    تموت وإنتي تلم في حق الدواء على خاطر توا في الوقت الحاظر الناس الكلها مديونة
     
    6 شخص معجب بهذا.
  5. hmz9

    hmz9 عضو نشيط

    إنضم إلينا في:
    ‏31 جانفي 2008
    المشاركات:
    299
    الإعجابات المتلقاة:
    360
      17-04-2008 13:32
    :bang:Edenya et les nouveaux systèmes
    ThAnX:satelite:
     
  6. sni1699per

    sni1699per نجم المنتدى

    إنضم إلينا في:
    ‏16 مارس 2007
    المشاركات:
    4.471
    الإعجابات المتلقاة:
    5.076
      17-04-2008 13:44
    والله احنا في البيرو يوميا التفسيرات كل لون و كريمة حتى الكنام حبينا زعمة نسالوهم على حويجات و قلنالهم اذا طبيب العائلة مسافر او خرج خارج للبلاد يتفرهد و ضرب شهر اش كون عوضو و اعلاش ما نمشيش مباشرة الى طبيب الاختصاص الحاصل دولاب كبير و انا ما نيش عارف وين يحبو يوصلو و لو انا l'assurance في الخمة نحيتها ماك عام على خاطر عندي سنوات عديدة و لا عديتلهم مرة وحده certificat و قاعدين يتمعشو في كيما حبو الحاصل ياش تحيني في 2.6% الخليفه عليه اما سراق يا خويا و اسال موظف و ما تسالش طبيب
     
  7. ramondo

    ramondo عضو مميز

    إنضم إلينا في:
    ‏21 أوت 2007
    المشاركات:
    639
    الإعجابات المتلقاة:
    1.072
      17-04-2008 23:30
    ربي يهديكم زدت علي وأنا مانيش ناقص تشاؤم.
     
  8. zig-zag

    zig-zag عضو فعال

    إنضم إلينا في:
    ‏25 جانفي 2008
    المشاركات:
    310
    الإعجابات المتلقاة:
    227
      18-04-2008 10:30
    المهم الكرني و السبطار لا، و طبيب العايلة ينجم يعديها عليك و يقلك نعرف الاختصاصات الكل و بالتالي ارجع بالتوالي، و الخلاص يخلصوك على حسابهم هما يعني الفيزيتا بحساب ارخص طبيب مبتدئ و الدوايات على سوم ارخص دواء صبة و التحاليل بسوم القرو gros خلي عاد كان واحد تعدى على الكلينيك يعطيوه ما يخلص التاكسي ولا اللواج الي هازتتو بركة، الحاصل هذا زادا لا ، مالا يفضللنا نظام كسر راسك ولا رجلك فوق رقبتك و ضاهرلي الثاني خير

    ربي يديم علينا الستر و يحفظنا من الامراض و الكنام و ما شابهها
     
  9. نسرقرطاج

    نسرقرطاج عضو مميز بالقسم العام

    إنضم إلينا في:
    ‏6 نوفمبر 2007
    المشاركات:
    3.182
    الإعجابات المتلقاة:
    7.721
      18-04-2008 10:39
    هدرة فارغة حكاية لكنام ... تفرعيسة سموها نظام

    الاولة صيام في صيام والثانية لا ترقد لا تنام

    والثالثة فليساتك مشو حرام في حرام​
     
    2 شخص معجب بهذا.
  10. comlotfi

    comlotfi عضو نشيط

    إنضم إلينا في:
    ‏25 فيفري 2008
    المشاركات:
    140
    الإعجابات المتلقاة:
    21
      18-04-2008 23:08
    كان جاء يصلح ها النظام راهو نجح في فرنسا منذ زمن
    و إذا في فرنسا فشل خلي في تونسنا الباهيا برشا
     

مشاركة هذه الصفحة

جاري تحميل الصفحة...