اللي تحكي فيه من علامات الساعة اللي الحق يولي باطل و الباطل يولي حق، يا معلم في عصرنا الحالي اللي يدعي لطريق الله ننفروا منو و من الجوامع تلقاهم معبين كان في المناسبات (التراويح و صلاة العيد و الجمعة) لاخي شيوليو الجوامع كي الكنائس يتعباو كان وقت يكتبوا الصداق و وقت مولود يتولد جديد هكة و إلا هكة مناسبات ما يختلفوش برشة، النقطة هذي ذكرتها قداش من مرة في المنتدى و النافع ربي. يا عباد ربي عكس الإنسان اللي يذكر في الله هو الإنسان اللي غافل اللي أغلبية العرب المسلمين هكة مع الأسف الشديد.
لاخر يقلي أحنا التوانسة أش دخلنا في فلسطنين؟ تي ماو الإسرائيليين الخاصبين فاكين جامع الأقصى اللي هو كان قبلة للمسلمين قبل ما الله أمر محمد صلّ الله عليه و سلم باش يحوّل القبلة هاكي لبيت الحرام اللي هو تو الكعبة الشريفة؟ هذا تاريخ مذكور في القرآن في سورة البقرة و إلا تصليو في التراويح تسمعوا برك و تستمتعوا بصوت اللي يصلي بالناس خاطرو يقرى بمقام الفلاني و الفهم ربي ينوب عليه و إلا تصليو 4 ركعات و بعد تخرجوا من الجامع تجريو للقهاوي و أنتوما كي تصليو و مخكم كيفاش شتعملوا قهوة؟ صدقوني أغلبية من الشعب التونسي جهال بمعاني القرآن الكريم إلا ما رحم ربي، تمنيت أنو في كل رمضان يصيروا دروس قبل أذان العشاء متع حتى ربع ساعة يا سيدي نفسروا فيهم ما كتب ربي من آيات في القرآن الكريم أما اللي نشوف فيه اللي يتعاود كل رمضان قراءة جماعية للجزء اللي شيتقرى في التراويح كليلة هاكي و إلا دروس فقه حول الصوم يا معلم الناس فدت في كل عام تتعاود نفس الكاسات متع أحكام الصيام.
اليوم و أنا نتفرج في فيديو اللي صورتو الإسرائيلية في جامع الأقصى و هي تتمنيك تقول ما فمة كان السياح صدقوني العصب طلعلي من العرب خاطر تقصد يا عرب اللي تحبوا ترجعوا جامعكم هاو السياح يدوروا فيه بأرحية و يلتقطوا في الصور التذكارية و أمنتوما راقدين يعني مستهزئة بالمسلمين.