1. كل المواضيع تعبّر عن رأي صاحبها فقط و ادارة المنتدى غير مسؤولة عن محتوياتها
    إستبعاد الملاحظة

عم فرجاني من الادارة ديما يعاني

الموضوع في 'أرشيف المنتدى العام' بواسطة papamoez, بتاريخ ‏13 فيفري 2009.

  1. papamoez

    papamoez عضو فعال عضو قيم

    إنضم إلينا في:
    ‏8 مارس 2008
    المشاركات:
    594
    الإعجابات المتلقاة:
    2.634
      13-02-2009 15:37
    :besmellah1:



    الطقس بارد ...الكبي هابط ...الكفتاجي و اللبلابي كلاولي حنكي ..القينية عاملتلي ماركاج ..

    قلت برا يا مواطن اركش في قهوة العادة و فك عليك من جوجمة فطور القايلة و ريحة الزيت المحروق ..و منظر المحزوق و المشقوق...و جميع انواع الفسوق..

    ماكنتش من العاكسين ..قصدت ربي للقهوة ..ايا هبطت كاس تاي (الفقر يعمل)..شعلت سيقارو ناتن و عافن ..و كي نتذكر الي انا شاريه مارشي نوار بالفين فرنك قلبي يغم عليا وتلعب عليا الدوخة ...

    طاااااااااااااااف طرطاااف .... و الله تقول زلزال ..نتلفت نلقى واحد من المتوظفين الي يلعب في الشكبة شعرة بركة لا هد الطاولة بالركيز و التبلبيز ..
    -هاها .. هاو الرجولية ولا لوح اربعة في الكارطة و زوز شكايب ...قوم روح شد بيروك يا فتوح ....اياااا.. الي بعدو يزين سعدو..

    ملا فجعة كليتها ..حطيت يدي على قلبي نلقاه يلوح في السانكيام ..

    قمت كي الناس الملاح وقلت نبدل البلاصة ..اي وين باش نقعد ..طواول الشكبة و الرامي مالين القهوة ..و شكون يسب و يركز اكثر..تلفت منا و منا ...نلقى راجل كبير في العمر شادد تركينة ..يمكن عمرو 55 سنة ..غاطس في جريدة البوق ..باكو بو ستة بحذاه وهو كي الشيمينية الدخان عامل عجعاجي..

    -انجم نقعد بحذاك يا حاج..

    من غير ما هز راسو جاوبني..

    -تفضل سي محمد ..مرحبا بيك

    -لا اله الا الله ...تي هاك تعرفني يا حاج ..بعد اذنك تنجم تقلي كيفاه ..

    غزرلي من ورا مراياتو الانتيكة ..تنهد ...كح ..و مبعد تكلم ..و قال.

    -اعوذ بالله من كلمة انا ...اما انا نعرف العباد الكل في لافايات..من المتوظفين حتى البنات..

    -ياخي تخدم هنا

    -ايييه وليدي عندي توة 30 سنا ..نخدم شاوش في شركة .....ما فماش حاجة مانعرفهاش..العباد الكل نعرفها ..

    -مازالت البركة يا عم أأأأأأأأأأ......

    -فرجاني..اسمي فرجاني ..و معروف بكلمة فرجاني ديما يعاني...

    -بعيد الشر ...ماو لاباس ..شنوة اح بح ..

    -ااااااااااااااااااااااااه اش باش نحكيلك و اش باش نقلك ..حكايتي حكاية و رواية ..فك عليك يا سي محمد ...ماناش في برنامج فرغ قلبك ..

    -و الله لا عم فرجاني..وذنيا محلولة اكثر من شبكة الفريق الوطني..ما عندي مانعمل ..و ماك تعرف التنسنيس هو الشعار الرسمي للموظف..

    طوا جريدة البوق ..و قال..

    -على شرط تهبطلي ديراكت ..

    -اتدلل يا حاج ...ايا عاد عم فرجاني هاني ركزتلك .....يا شوليقة جيب مباشرة بالشكلاطة لعم فرجاني..

    جات القهوة ..شعل وحيد بو ستة ..عمل رشفة ..حس الشكبة تنحى ..السبان ركح ...و تكلم عم فرجاني ديما يعاني..


    نقوم الخمسة متاع الصباح ..نصلي ..نضربلها وحيدة درع من عند عشيرة عمري ..نحل الباب لولدي الي مروح وقتها يعلم كان ربي وين كان..نلبس حوايجي ..و كان الطقس كيما ها الايامات ..نلبسلها بوت كوتشو يوصلي لحزامي ..و فوق هاذا الكل نحط مشمع على بدني الكل ...نحل الباب و نقصد ربي ..

    العبد ل لله نسكن في حومة شعبية ..تنجم تقول فوضوية ..الحاصل كي تصب الشتاء ..تولي الحومة تشبه لبحر كبير ...تعرف يا سي محمد اولاد الحومة كي تصب الشتاء يوليو يحرقو لطاليا من قدام دارهم ..

    نبدا عاد هاكة الصباح و انا انقز و انفركح بين قلت الماء و الطباعي ...و ساعات نتفرش و نجي مسبول على طول ضهري ...بعد يمكن ربع ساعة نخلط لمحطة الكار ..نلقاها كي العادة دزني و اندزك ... و ريحة القوارص تفحفح ..البنات و النساء يبداو سيس دوز بالماكياج تقول ماشين لعرس ( و الله العظيم نقعد باهت وقتاش قاموا و وقتاش حضروا رواحهم )...و الرجال مازالو راقدين و هوما واقفين .. يبحلقوا في الوان قوس قزح الملطخة على وجوه الجنس يا لطيف..تجي الكار المحنونة تتمايل و تتبختر..يتحلو البيبان ..و ذراعك يا علاف...

    ما تسمع كان ...اجريولي سطوشي ...نحي يديك يا الي بيك يا الي عليك..تي شبيك لصقتني كي التنبري....

    و الكار تملى من غير ما تفرغ ..و فروخ المكتب عاملين فيها شاطح باطح بالكلام الزايد و قلة الحيا ..و انا خوك متكونسي مع البلار ..و نلعن في الكار و الدمار..

    بعد ساعة عذاب ..نخلط للعاصمة ..نعمللها جرية حارة للخدمة ...حياتي كاملة و انا روطار..نسمي باسم الله و ندخل ..و يبدا الخنار ...

    الوجوه الكل كاششة من قلة النوم .. كلمة صباح الخير تولي بالفلوس ..نهز البلاطو و نهبط نشري قهوة للشركة الكل ..
    كي نرجع نلقى جحافل المواطنين احتلت الادارة ...بكلها مزروبة ..الصياح و العرك و المعروك ..و كي تكلم واحد منهم يقلك .. ياخي ماتعرفنيش انا شكون ...

    اخلاقي تفزد ...نشعل السيقارو في جرة خوه ..و نبدا نصبر في روحي..صباح واتوة يتعدا.. انا هكاكة و يضرب التلفون ..

    -يا عم فرجاني تي ويني هاكة القضية ..الزملاء الكل يستناو فيك..

    نجيف القارو ..و نمشي لبيت الفوتوكوبي ...و نعمل 56 نسخة للكلمات المتقاطعة متاع جريدة البوق...و انفرقهم على البيروات ..

    مع الاحداش تفرغ الادارة ..و يبداو الخدامة يتسرسبوا الواحد في جرة الواحد.
    و نقعد فيها كان انا و المواطنين ..و نبدا انريض فيهم ..مايسالش ارجعوا غدوة ..

    مع نصف نهار نقصد ربي باش نفطر..الله غالب مانحبش حمالة الماكلة من الدار ..اوبليجي عليا نفطر البرة ..ايا نوصل للمطعم ..نحضر روحي نفسانيا..و نقرى الميني.. تشدني الغصة ... تي علاش تقرى فيها يا الفرجاني ..علاه العوج تي ماو ضاهرة يا لبلابي يا كفتاجي..يا كسكروت عفن (حاشا نعمة ربي)..
    و الله يا سي محمد ساعات نطيحلك بخنفوسة في الكفتاجي ...مصلي عا النبي عندها صحة أبدان متاع كلاي ...نبدا نجبد في كعبة الفريت و هي تجبد ...

    يمرار الفطور...نتعدى للدخاخني و نشريلها باكو دخان مارشي نوار..و دغري للقهوة ....

    في القهوة كل يوم نحسن من قاموسي اللغوي و نسمع اخر ما صدر في عالم الشتيمة و السفاهة ..وكان تلقى حضبة من غير كارطة اعرفهم باز راهم موظفين قاعدين يحفروا و يكمبنوا ضد الكليك الاخر ..و يستعملوا اخر التقنيات المهدمة و المدمرة... تي شبيك حتى هو الموظف للموظف رحمة هاهاهاها ...


    مع الساعتين نرجع للادارة نلقى الحس بايت ...مازال ما جاء حد..مع الساعتين و نصف ..يهدوا الخدامة ...الي في يدها قفة من باب الفلة ...و الي شاري شوية قش من الصولد .. ملا حالة ها الصولد ... لاموضة عشرة سنين لتالي يشريها السنا و ماشي في بالو عمل افار... و الي في يدو ساك حوايج شاريهم من الفريب باش يدبر فيهم راسو و يبيعهم في الخدمة ...

    الحاصيلو العجب تشوفو..مع ماضي ثلاثة ..يهبط صمت القبور على الادارة و بكلها تشد بيرواتها ..و تبدا ريحة السلاطة المشوية و امك حورية طالعة ...
    و الله ربي معاهم النساء كان مايعملوش هكة مايخلطوش مساكن ..اهوكة تلقاها عشية كاملة وهي تفصص في الجلبانة و تشوي في الفلفل و البصل..ماتخلط الخمسة ونص الا ما العشاء طاب ...مجبورة الله غالب...

    و الرجال يوليو اشباح ...ريحة الريحة ...و كي تبعت الحكاية ...عرفت الي هوما غاطسين في الاورديناتور ....كل واحد و جوو... الي يشاطي و يباطي ..والي خانس ورا الاكرون يتفرج في ..............( نعرفك فهمتني يا سي محمد) ..الانترنات نقمة برجولية ...باش تقضي على الخدمة فرد ضربة ..بكلها كونكتي و غاطسة في التمعشيق و الترونيق..

    و الخدمة اخر اهتمامتهم ...سلاحهم ارجع غدوة و الاعلامية ماتخدمش..


    ماتوصل الخمسة الا ما روحي تطلع بريحة التطييب ..وقتها يجي الموعد الرسمي و القار لمقابلة المدير..ندخل للبيرو نلقاه وجهو احمر و يتربث كي يشوفني ..يتبهذل.... يسكر الارديناتور بزربة و يقلي ...

    -اهلا بسي نشرة الاخبار ...ايا سمعني.

    و نبدا عاد نسرسط في درسي ..شكون جاء روطار..شكون كركر ..الي عمل عركة ...الي كمبن ...الي دخل للنقابة باش يقضي مصالحو الخاصة ...

    و كل يوم نخرج بخلاصة الي الخدامة الكل كركروا و كمبنوا...


    الستة غير ربع تلقاني نتقروح قدام المحطة..نستنا في للات المواصلات..
    اخيب وقت في النهار ...نطلع في الكار و يدي على خشمي و لخرا على سطوشي..و نبدا نستنشق في ثاني اكسيد الضبوط.. يا كيميائي يا جرثومي يا نووي..الجماعة الكل متعاركين مع الماء و الصابون...و نبدى نحمد في ربي الي الحال شتاء ..على خاطر في الصيف ندوخ فرد ضربة..
    يا سي محمد كان تشلق بينا أمريكا لاما تجي تخصب اليورانيوم و البلوتونيوم في..... ضبابط مواطنينا ...

    نخلط للحومة مهدود ..ماصدق الى ربي نلقا بلاصة في النقل البحري ..اه فتك بالحديث ...نحنا في الحومة وقتلي تصب الشتاء نستغناو على النقل الريفي و الاونز ..و ندورها فلايك...و الغني فينا يستعمل جات سكي...
    مرة في قالب غلطة نلقاو يخت يحوس في الحومة في عقابات الليالي ... طلع
    يلوج على الشراب مارشي نوار...الحق ولاد الحومة قاموا معاه بالواجب و فرحوا بيه ..

    نحل باب الدار ..نلقى ولدي مازال كي قام من النوم ..وجهو منفوخ ...و يبدالنا في مسلسل حلبان الفلوس ...و يا ويلي كان ماعطيتوش..

    ناكل الي كتب من ربي ..كويس تاي ..و تبدا وجيعة الراس متاع الموجيرة...

    ..ولدك عمل و فعل ....بنتك بايتة البرة البارح في الليل....المصروف وفى ...ولد خوك وقتاش باش بروح للبلاد ..راهو عرالنا راسنا بالماكلة..تي حتا نلقاوها لرواحنا....ووووووووووووووو

    يطلعلي الدم و المايونيز لمخي..... نهرب للتلفزة...يا بو قلب كل يوم برنامج اجتماعي ...البكاء و النويح و التمخيط ...كل يوم هاذيكة المعبوكة...فديت من النواح ..تي انا مشاكلي قد الاجبال و نزيد نسمع مشاكل العباد..

    بالغزول نمشي لبيت النوم نكب على راسي و نرقد...و ن ....رق.......د ...و ن....رررققققققق.........ددددد


    -
    ايا صلي عاالنبي عم فرجاني ..و يزينا م البكاء راك راجل و سيد الرجال..

    -لا مانيش راجل .. مانيش راجل.. مانيش راجل..................



    النهاية





    [​IMG]
     
    106 شخص معجب بهذا.
  2. lotfi222

    lotfi222 كبار الشخصيات

    إنضم إلينا في:
    ‏24 فيفري 2008
    المشاركات:
    8.272
    الإعجابات المتلقاة:
    28.701
      13-02-2009 16:34

    فعلا أمتعتني بأسلوبك النقدي الساخر

     
    5 شخص معجب بهذا.
  3. afsus

    afsus نجم المنتدى

    إنضم إلينا في:
    ‏16 ماي 2008
    المشاركات:
    16.498
    الإعجابات المتلقاة:
    38.134
      13-02-2009 16:52
    أبدعت بدرجة إمتياز ..فيلم وثائقي من واقع الحياة..:easter:
     
    3 شخص معجب بهذا.
  4. anacondas

    anacondas عضو فريق عمل المنتدى العام

    إنضم إلينا في:
    ‏16 ديسمبر 2008
    المشاركات:
    3.274
    الإعجابات المتلقاة:
    23.643
      13-02-2009 17:13
    :besmellah1:

    جازاك الله خيرا يعطيك الصحة:satelite:
     
    3 شخص معجب بهذا.
  5. elninio_bj

    elninio_bj نجم المنتدى

    إنضم إلينا في:
    ‏31 أكتوبر 2008
    المشاركات:
    2.790
    الإعجابات المتلقاة:
    4.132
      13-02-2009 18:05
    :besmellah1:



    هذاك جزء من القصة و ما خفي كان اعظم.

    واضح ؟


    :ahlan:
     
    3 شخص معجب بهذا.
  6. Dali01

    Dali01 عضو

    إنضم إلينا في:
    ‏3 أفريل 2006
    المشاركات:
    74
    الإعجابات المتلقاة:
    28
      13-02-2009 19:19
    يعطيك الصحة
    :easter::easter::easter::easter::easter:
     
    3 شخص معجب بهذا.
  7. barhoum

    barhoum نجم المنتدى

    إنضم إلينا في:
    ‏11 نوفمبر 2006
    المشاركات:
    1.840
    الإعجابات المتلقاة:
    2.725
      13-02-2009 19:45
    :besmellah1:


    اسلوب رائع لنقل صورة من صور الحياة لقد ابدعت تشجيعاتي لك اخي
     
    4 شخص معجب بهذا.
  8. yuri1

    yuri1 عضو

    إنضم إلينا في:
    ‏27 أكتوبر 2007
    المشاركات:
    558
    الإعجابات المتلقاة:
    454
      13-02-2009 19:54
    يعطيك الصحة
     
    2 شخص معجب بهذا.
  9. سيمووو

    سيمووو عضو مميز بمنتدى المرأة والأسرة

    إنضم إلينا في:
    ‏10 فيفري 2008
    المشاركات:
    1.736
    الإعجابات المتلقاة:
    4.470
      13-02-2009 21:16
    نقد بناء و اسلوب متميز بالكلمات وصلت الصورة
    اخي ليس من حقك ان تحرمنا من ابداعك
     
    5 شخص معجب بهذا.
  10. atrasfax

    atrasfax نجم المنتدى

    إنضم إلينا في:
    ‏9 سبتمبر 2007
    المشاركات:
    1.776
    الإعجابات المتلقاة:
    787
      13-02-2009 21:32
    اسلوب متميز
     
    2 شخص معجب بهذا.

مشاركة هذه الصفحة

جاري تحميل الصفحة...